Kalaallit Nunaanni meeqqanik katsorsaajartorlutik angalasartut

Kalaallit Nunaanni Meeqqanik Katsorsaallutik Angalasartut ukiumi 2015-imi, meeqqat inuusuttullu kinguaassiutitigut atornerlunneqarsimasunut sumiiffimminni pitsaasumik tarnikkut katsorsartissinnaanissaannut periarfissinniarlugit pilersinneqarput. Ukiumi 2021-mi Meeqqanik Katsorsaallutik Angalasartui kalaallit danskillu suleqatigiinnerannit immikkut aningaasaliiffigineqarput, taakkulu katsorsaasut amerlanerusut atorfinitsinnerannut ilinniarteqqinnerannullu, sumiiffinnilu katsorsaasarnerit amerlinerunissaannut kiisalu aaqqissuussaanerusumik qulaajaasarnermik katsorsaasarnermillu qulakkeerinninniarnermut atorneqarput. Piffissami 2021-2023-imi  Meeqqanik Katsorsaallutik Angalasartui illoqarfinni arfinilinni kommunini tallimani katsorsaanerit ukiumik ataatsimik sivisussusilinnik aallussaqarsimapput. Ataatsimut meeqqat 93-it katsorsartinnernik aallartinnissimapput, taakkunanilu katsorsaalluni oqaloqatiginninnerit meeqqanut sammiviliusunik arfineq marluusunik saniatigullu meeqqat isumassuisuannik ilitsersuinerit ingerlanneqarsimallutik. 

VIVE-p ukiumi 2021-imiit sumiiffinni katsorsaasarsimanerit qanoq inerneqartarsimanerat aammalu meeqqanut sumiiffinnullu qanoq sunniuteqartarsimanerat misissorsimavaat.

Inernerit

Misissuinerit takutippaat, meeqqat inuusuttullu atornerlunneqarsimasut aammalu allanik sakkortuumik misigisaqarnerlussimasut amerlasuut, Kalaallit Nunaanni illoqarfinni nunaqarfinnilu minnerni nalinginnaasumik katsorsaaffiusarsimanngitsuni katsorsartinnissamut neqeroorummik tigusaqarsimasut. Aammalu sumiiffinni ilisimasaqarnerulernerit pilertornerisa kingunerisaanik meeqqanik kinguaassiutitigut atornerlunneqarsimasunik paasinnissinnaasut katsorsaasinnaasullu amerlatsissimallutik.

Meeqqat katsorsartissimasut amerlanerpaat ajunngitsumik inerneqartitsisimanerat katsorsaanermut qutsatissaasut ilagaat. Meeqqat annertunermik misigisaqapilussimanerpaat annertunerusumik katsorsartinnerit unitsittarsimavaat.

Meeqqanik Katsorsaallutik Angalasartunili ingerlariaasertaaq isumaqarpoq, meeqqat pisariaqartitaannut aammalu piffissamik eqquilluartumik suliniuteqarnissaq aammalu sumiiffinni immikkut nangitsisinnaanissamut ataqatigiissaarisinnaanissaq ajornakusoorsinnaasartoq.

Maluginiagassat    

VIVE innersuussivoq, Kalaallit Nunaanni sumiiffinni assigiinngitsuni meeqqanut atornerlunneqarsimasunut tarnikkut katsorsaanermik pitsaalluinnartumik suli neqerooruteqartarnissaat. Sumiiffinni ornigulluni katsorsartissinnaanissamut periarfissap saniatigut qarasaasiatigut katsorsaanissamut oqaloqateqartarnissaq periarfissaatinneqarnissaa nangillugu suliniutigineqarfigisinnaavoq.

Tamatuma saniatigut VIVE-p innersuuppaa, katsorsaanerup pinnginneraniit naammassinninnissap tungaanut ingerlarngi pillugit suleqatigiinneq pitsaanerulersinneqassasoq, taamaasinikkut Meeqqanik Katsorsaallutik Angalasartut sumiiffinni katsorsaaneri aallartinnerini meeqqat annertunersusumik piareersimasinnaaniassammata - meeqqallu katsorsartereernerisa kingorna annertunerusumik malitseqartinneqarsinnaassammata.